منتديات زهرة السوسن

عالم بدون حدود من المتعه والصداقه والمعرفه
 
الرئيسيةالتسجيلدخول

شاطر | 
 

 الحمد لله انى اتولدت راجل.

اذهب الى الأسفل 
كاتب الموضوعرسالة
أسامة عبد المحمود



عدد الرسائل : 23
نقاط : 47
تاريخ التسجيل : 14/09/2010

مُساهمةموضوع: الحمد لله انى اتولدت راجل.   الأربعاء أكتوبر 27, 2010 12:52 am

: الحمد لله انى اتولدت راجل...
مسالة انك تكون بنت دة عذاب ما بعده عذاب...اتخيل انك بت بتدرس فى الجامعة...و يلا خلينا نمش نشوف تفاصيل يومك حتكون كيف...

تصحى من الصباح شان تمشى الجامعة بتاعتك...تتسوك و تجى تصطبح...امك تقول ليك اعملى قهوة لابوك...اخوانك كلهم ما بعملوا فى حاجة لكن انت اللى يفترض تعملى قهوة ابوك بالرغم من انك طالعة و اتاخرت...اوكى ما مشكلة تعملى القهوة و تمشى تتجهزي وتتهندمي ...ابوك يقول ليك اكوى لى ملابسي شان أنا خارج للعمل و ما عندى ملابس مكوية...تكويها ...تلبسى ملابسك بسرعة و تجى طالعة تقابلك امك..و تسالك دى أيه البهدلة دى...الناس أيش يقولوا عليك ؟؟ امشى حطي ليك مكياج أو أي حاجة فى وجهك الملان حبوب ده...ترجعى و تعملى حبة مكياج...يقابلك اخوك الاصغر منك...يبدا يصرخ فيك أيش هذه الطرحة اللى فى راسك يعنى زى الكاشفة راسك و ماشة بدون حشمة...و يحلف الف يمين الا تغيريها و الا ما حتطلعى من البيت...امك تشتبك معاه...وتحصل مشكلة و جوطة...تحاولى تستقوى بامك و تواصلى يعترض طريقك و يضربك و يرميك في الأرض ...تضطرى ترجعى تغيريها و تجى طالعة و الوقت بتاعك ضايق...يعنى المحاضرة بدات و انت لسة...تجى طالعة يقابلك اخوك الاكبر منك شايل ليك ملابس التمرين حق الكورة و عنده مباراة مهمة فلازم تغسلى ليه ملابسه و تكويها...امك تتدخل واسطة و تقنعه انك اول ترجعى حتنجزى المهمة...

تجى ماشة بجمار دكان الحارة...فى الكورنر فى شلة اولاد عطالة...العيون كلها تبحلق فيك من ما تطلعى من بيتكم و تتابعك لما تجى من عندهم ...اولما توصلى تبدى تسمعى مشاغلات و غزل الخ الخ... و الغريبة جزء منهم اصحاب اخوانك شديد...

فى الشارع الباصات ما بتقيف ليك لانه انت ما بتقيفى شماعة يعني واقفة و شكلك طالبة...بعد تعب يجى باص هايس...اول ما توقف المحاسب يقول ليك هذها الباص إنجيز ما بنعرف طلبة و لا غيرو...تركبى مضطرة...الشاب اللى على شمالك يبدأ يلصق جسمه بجسمك...تتضايقى و تزحى يمين شوية و يواصل سخفه و يضايقك تانى...تتحركى لليمين قليل ...جسمك يقرب من رجال كبير شيبه بيدك اليمين من غير ما تقصدى...يفتكر انك قاصدة حاجة يبدأ يتساخف هو كمان...تمسكي نفسك وتجتهدى عشان تجلسي فى اضيق مسافة خشية الحرج...فجأة يضرب تلفونك...لو حاولتي رديتي اللي في داخل الباص كلهم يسمعوكي...و هاك يا تعليقات...ما تردى...تسمعى تعليقات..يعنى لو ما عايزة يضرب ليك ليش أعطيتيه رقمك ليه...و سحابات ظنون سئية تطلع بشبابيك الباص الهايس من كل الاتجاهات...تحمدى الله انك وصلت..اول ما تنزلى واحد بعربية خاصة يعمل ليك اشارة و يحاول يتبسم ليك...شكله مرتاح ورايق...ما تشتغلى بيه يقول ليك بصوت عالى بعض العبارات الشوارعية السخيفة...تحاولى تدخلى الجامعة بسرعة شان تلحقي محاضرتك...يوقفوك فى البوابة لانك لابسة بودى ضيق......المهم بصعوبة كدة واحد من ناس الحرس يحن عليك فيتكلم مع زملائه و يدخلوك تصحبك عبارة مسئية و سخيفة من اللى كانوا رافضين يدخلوك...تجى القاعة المحاضر يستقبلك بعبارات سخيفة...الليل كلو تتكلموا فى التلفونات و يغلبكم تصحوا بدرى...و الخ الخ...

لانه انتي حلوة .. يعزمك زميلك لسندوتش...يشوفك قريبكم...يعمل ليك مشكلة...من هذا و بتعرفيه من وين و الخ الخ...تعملي ما سامعاه و ما تردى عليه...ينتهز اول فرصة و يبدا يتحرش بالولد الذي عزمك...اعمل حسابك دى قريبتى و انا بعمل ليك و انا بسوى ليك الخ الخ...طبعا ده اذا كان ضعيف و صحته تعبانة..اما اذا كان قوى و مفتل العضلات ممكن يروح ضارب الشاب داك ببساطة...اما اذا ما كان قريبك و كان واحد من جيرانكم فى الحارة ببساطة ممكن ينشر قصة فى الحارة انك طالعة مع فلان و نازلة مع علان...او ياحبيبي دى موضوعها منتهى اصلاً ماسكها واحد بيدرس معاهم ..و دى ايه و ايه...و الموضوع ممكن يتطور و تصبحى بت سئية السمعة لمجرد واحد ظنه سئ....

تجى راجعة الطريق كله عيون بتتفحصك و تبحلق فيك و عبارات غزل و مشاغلة كمية... و فى الموقف واحد او اتنين يتعمدوا يضايقوكي او يحتكوا بيك و نيتهم معروفة...

ترجعى البيت تعبانة و متضايقة...امك تصر انك لازم تغسلى ملابس اخوك و الا حيجى من الشغل حيخلق معاك مشاكل ...تشيلى الملابس تغسليها و فى اثناء ما بتنشريها امك تجى طالعة ماشة بيت العزاء و تقول ليك جهزي الغداء لاخوانك و ما تنسى ابوك أعطيه حبوب الضغط....دقيقتين اخوانك الصغار يجوا من المدرسة و الكلم والإزعاج يبدأ ما تجهزوا لينا الغداء...ما جوعتونا...الخ الخ...الصغير عامل مشكلة قطعوا ليه قميصه و شابك فيك الا تخيطى ليه قميصه الأن ..كانك انت اللى شططيه.....و بعدها تمشى تعملى الغداء و الشاى...زى الساعة ستة تقررى تمشى الصالون تذاكرى قليل ...بعد خمسة دقائق يجى اخوك الصغير يصيح فيكي امشى أدخلي جوه بسرعة فى اولاد أصحابي جايينى...تتخارجى و دايرة تموتى من الغيظ....يجى لاحقك اعملى ليهم شاى...تعمليه...تزهجى تسيبى مذاكرتك تمشى التلفزيون..اول ماتجلسي كده يجى اخوك الكبير يمسك منك الريموت و وبصوت عالي يقول ليك امشى أدخلي غرفتك لانه اصحابى جايين يحضروا معاى الكورة
يعني يا جماعة الحمد لله انى اتولدت راجل

الرجوع الى أعلى الصفحة اذهب الى الأسفل
أهاات

avatar

عدد الرسائل : 164
نقاط : 303
تاريخ التسجيل : 29/08/2010

مُساهمةموضوع: رد: الحمد لله انى اتولدت راجل.   الأربعاء أكتوبر 27, 2010 11:27 pm




يا لهوووي

ديه البنت عندكم حاجة صعبة اوي الله يكون في عونها بصراحة

اسامة

تسلم ايديك على الموضوع الجميل

تحياتي وتقديري
الرجوع الى أعلى الصفحة اذهب الى الأسفل
 
الحمد لله انى اتولدت راجل.
الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
منتديات زهرة السوسن  :: ازهار العـــــام :- :: 1- المنتدى العام-
انتقل الى: